काठमाडौं, २४ भाद्र । प्रधानमन्त्री केपी शर्मा ओलीले काठमाडौंमा पदबाट राजीनामा दिनुभएको छ ।
प्रधानमन्त्री केपी शर्मा ओलीले दिनुभएको राजिनामा राष्ट्रपति रामचन्द्र पौडेलले स्वीकृत गर्नुभएको छ ।
राष्ट्रपतिका प्रेस सल्लाहकार किरण पोखरेलले राजीनामा स्वीकृत भएको जानकारी दिनुभएको छ ।
जेन्जीको आन्दोलन चर्केपछि ओलीले आज नै पदबाट राजीनामा दिनुभएको थियो ।
सोमबारबाट जारी जेनजीहरूको प्रदर्शन मंगलबार कर्फ्यू लगाउदा पनि नरोकिएर उग्र बनेपछि प्रधानमन्त्री ओली राजीनामा दिन बाध्य हुनुभएको हो ।
जेनजीहरूको प्रदर्शनका क्रममा सोमबार सुरक्षार्थ खटिएका प्रहरीहरुले संयम राख्न नसक्दा एकैदिन १९ जना युवाहरूले ज्यान गुमाएका थिए ।
सडकमा समवयी साथीहरुको रगत पोखिएको र आफ्नो अगाडि जीवन लिला समाप्त भएको देखेका युवाहरु मंगलबार बिहानैदेखि सडकमा प्रदर्शन उत्रिए ।
सो क्रममा युवाहरूले शीर्ष नेताहरूका घर, पार्टी कार्यालय, सरकारी कार्यालय, संसद भवन र नेपालको प्रमुख प्रशासकीय केन्द्र सिंहदरबारको गेटमा पनि आगजनी गरे ।
सोमबारदेखि प्रदर्शनमा उत्रिएका जेनजीहरूले आज पनि प्रदर्शन जारी राखेका छन् । अहिले काठमाडौं लगायत देशका विभिन्न ठूला शहरहरू र जिल्ला सदरमुकाममा प्रदर्शन भइरहेको छ ।
शीर्ष नेताका घर, पार्टी कार्यालय, प्रहरी कार्यालयहरूमा प्रदर्शनकारीहरूले लगातार ढुंगामुढा गरिरहेका छन् ।
