टोरन्टो(क्यानडा), २६ भाद्र । नेपाली जनसम्पर्क क्यानडाका सभापति बुद्धिप्रसाद ओलीले एक विज्ञप्ति जारी गर्दै जेनजीले गरेको प्रदर्शनलाई उत्तेजक बनाएर त्यसको आवरणमा नेपालको लोकतान्त्रिक व्यवस्थाविरुद्ध गर्न लागिएको षड्यन्त्रप्रति सबैलाई चनाखो बन्न आग्रह गर्नुभएको छ ।
उहाँले प्रधानमन्त्रीले राजिनामा दिएपछि भएका अराजक,हिंसक र ध्वंसात्मक गतिविधिको निन्दा गर्दै आन्दोलनकारीको आवरणमा केही अराजक समूहबाट पार्टी सभापति शेरबहादुर देउवा र केन्द्रीय सदस्य एवम् परराष्ट्र मन्त्री डा. आरजु राणा देउवामाथि भएको सांघातिक हमलाको घोर निन्दा गर्नुभएको छ । उहाँले यो हमला केवल सभापतिमाथि मात्र नभई सम्पूर्ण लोकतान्त्रिक मूल्य र कांग्रेस परिवार माथिको आक्रमण भएको उल्लेख गर्नुभएको छ ।
जनसम्पर्क समिति क्यानडाका सभापति ओलीले यस कठिन घडीमा पाटी सभापति र परराष्ट्रम न्त्रीको शीघ्र स्वास्थ्यलाभको हार्दिक कामना गर्दै लोकतन्त्रमाथि हुने हरेक प्रहारविरुद्ध दृढतापूर्वक उभिन सबैलाई आह्वान गर्नुभएको छ।
उहाँले भन्नुभएको छ, लोकतन्त्रको रक्षा तपाई हाम्रो साझा जिम्मेवारी हो । नेपाली कांग्रेसले बोकेको इतिहास, मूल्य–मान्यता र जनताको बलिदान कुनै पनि बहानामा सम्झौता हुन सक्दैन ।
