काठमाडौं, २३ वैशाख । नेपाली कांग्रेसका सभापति शेरबहादुर देउवाले पार्टीको नेपाली जनसम्पर्क समिति समन्वय विभागका सदस्यहरुलाई नियुक्ति पत्र प्रदान गर्नुभएको छ ।
बुढानीलकण्ठस्थित उहाँको निवासमा मंगलबार बिहान विभागद्धारा आयोजित एक कार्यक्रममा पार्टी सभापति देउवाको विभागका सदस्यहरुलाई मनोनयन गरिएको पत्र प्रदान गर्नुभएको थियो ।
सो अवसरमा विभागका प्रमुख एवम् नेपाली कांग्रेस केन्द्रीय सदस्य किरणराज शर्मा पौडेलले विभागका सदस्यहरुलाई खादा लगाएर शुभकामना दिनुभएको थियो ।
पार्टी सभापति देउवाले विदेशमा रहेका सम्पूर्ण जनसम्पर्क समितिहरुलाई समन्वय गरेर नेपाली कांंग्रेसको हित र नेपालको आर्थिक सामाजिक विकासमा सहयोग पुर्याउन विभागलाई सफलता मिलोस् भन्ने शुभकामना पनि व्यक्त गर्नुभएको छ ।
विभागका प्रमुख एवम् केन्द्रीय सदस्य पौडेलले विभागका सबै सदस्यहरुले पार्टीको,नीति,नियम र अनुशासनको परिधिभित्र रही मर्यादित ढंगले विभागका क्रियाकलापलाई अगाडि बढाउन मन,वचन र कर्मले सहयोग गर्नुहुने विश्वास व्यक्त गर्नुभएको थियो ।
