बुटवल(रुपन्देही), १३ माघ । नेपाली कांग्रेसको पूर्वआप्रवासी समन्वय विभागद्धारा आयोजित लुम्बिनी प्रदेशस्तरीय दुई दिवसीय सम्मेलन सम्पन्न भएको छ ।
रोजगारीको सिलसिलामा विदेश गएर त्यहाँको ज्ञान,प्रविधि र सीप सिकेर स्वदेश फर्केका कर्मयोगी नेपालीहरुलाई संगठित गरी उनीहरुको सीप अनुसारको व्यवसाय सिर्जना र विस्तारमा सघाउने उद्देश्यले गठन भएको विभागले विदेशबाट फर्केका नेपालीहरुले सामना गर्नुपरेका समस्या र तिनको समाधान खोज्ने अभिप्रायले यो सम्मेलन आयोजना गरेको थियो ।
माघ १२ र १३ गते बुटबलमा आयोजित सम्मेलनको समुद्घाटन नेपाली कांग्रेसका उपसभापति एवम् केन्द्रीय नीति,अनुसन्धान तथा प्रशिक्षण प्रतिष्ठानका प्रमुख पूर्णबहादुर खड्काले गर्नुभएको थियो । सम्मेलनमा लुम्बिनी प्रदेशका सबै जिल्लाका प्रतिनिधिहरुको सहभागिता रहेको थियो ।
नेपाली कांग्रेसका केन्द्रीय सदस्य एवम् विभाग प्रमुख दिनेश कोइरालाले भेलाबाट महत्वपूर्ण सुझावहरु प्राप्त भएको बताउनुभएको छ ।
सम्मेलनमा नेपाली कांग्रेसका केन्द्रीय सदस्य एवम् पूर्वमन्त्रीद्धय बालकृष्ण खाँण र डा.मिनेन्द्र रिजाल, केन्द्रीय सदस्य एवम् राष्ट्रिय योजना आयोगका पूर्वउपाध्यक्ष डा.गोबिन्द पोखरेल, लुम्बिनी प्रेदेश पाटी सभापति अमर सिंह पुन , लुम्बिनी प्रेदेश पाटी महामन्त्री बिक्रम खनाल, लुम्बिनी प्रेदेश पाटी सहमहामन्त्री निमा गिरी , रुपन्देही पाटी सभापति रामकृष्ण खाँण लगायतका नेताहरुको सहभागिता रहेको थियो ।
