सानेपा(ललितपुर), १० पौष । नेपाली कांग्रेस केन्द्रीय कार्य सम्पादन समितिको बैठक आज पनि जारी हुने भएको छ । पार्टीका मुख्य सचिव कृष्णप्रसाद पौडेलले दिनुभएको जानकारी अनुसार आज दिउँसो १ः०० बजे बैठक प्रारम्भ हुने छ ।
पार्टीका कार्यवाहक सभापति पूर्णबहादुर खड्काको सभापतित्वमा बुधवार पार्टीको केन्द्रीय कार्यालय, बी.पी. स्मृति भवन, बी.पी.नगर, ललितपुरमा बसेको बैठकले प्रदेशसभा अन्तर्गतको समानुपातिक सूचीमा रहेका १९ जनाको नाम हटाउने निर्णय गरेको छ ।
‘प्रदेशसभामा बन्दसूचीमा रहेका साथीहरू बन्दसूचीबाट आफ्नो नाम हटाएर संघीय समानुपातिकमा जान चाहने १९ जनाको सूची पास गरिएको जानकारी पार्टी प्रवक्ता डा. प्रकाशशरण महतले दिनुभएको थियो । उहाँका अनुसार पार्टीको सो निर्णयबारे निर्वाचन आयोगलाई जानकारी गराइने छ ।
बैठक पछि पार्टीले जारी गरेको विज्ञप्तिमा बुधवारको बैठकमा महामन्त्री गगनकुमार थापा, सहमहामन्त्रीहरु— महेन्द्र यादव र बद्री पाण्डे सदस्यहरु– बिजयकुमार गच्छदार, कृष्णप्रसाद सिटौला, डा।शेखर कोइराला, ज्ञानेन्द्र बहादुर कार्की, उमा रेग्मी, सुजाता कोइराला, एन.पी.साउँद र आनन्द प्रसाद ढुङ्गानाले आ–आफ्नो धारणा व्यक्त गर्नुभएको उल्लेख छ ।
